LEGAZPI CITY – Nakakolekta an Commission on Election nin tone-toneladang mga ilegal na mga campaign materials sa enot na duwang aldaw kan nationwide operation oplan baklas.
Segun ki Comelec Spokesperson Atty. John Rex Laudiangco sa intrevista kan Bombo Radyo Legazpi na kadakol sindang natanggal na mga pig-aapod ninda na unlawful campaign materials o mga dae nagsunod sa rekisitos na pigbugtak kan komisyon.
Nangenot sa mga rehiyon na pinakadakol na nakolekta iyo an National Capital Region, na sinundan man kan Region 3, Region 4a, asin Region 5.
Makakaresibi nin notice an mga kagsadiri kan mga poster asin papaliwanagon an mga ini sa laog nin 3 aldaw kun nyata dae sinda dapat kasuhan kan komisyon.
Piglinaw man kan opisyal na wara pa man sindang jurisdiction nganing magtangkas kan mga campaign materials kan mga aspirante sa local position nin huli sa bulan pa nin Marso nagpopoon an karampanyahan kan mga ini alagad may mga poster man kan mga ini an tinanggal na nin huli ta nakakabit ini sa mga poste kan kuryente asin mga kahoy.
Kun siya an hahaputon, ipahiling na sana suboot kan mga kandidato sa mga botante na kaya ninda na magsunod sa mga kasuguan kan komisyon kun mawot talaga nindang pilion sinda kan mga ini.
Pwede lang magbugtak an mga kandidato kan saindang mga campaign materials sa mga designated common poster areas, private property na may consent kan may kagsadiri, asin dapat 2×3 feet sana an size kan poster.
Pagirumdom man ni Laudiangco na dapat may nakabugtak man sa mga campaign materials na “paid for” kasabay an pangaran kan kandidato asin address kaini siring man an “paid by” na nakabugtak man an pangaran kan nagbayad asin complete address kaini.
