LEGAZPI CITY – All systems go na asin naghahalat na sana kan mga magpaparehistro an Commission on Elections (COMELEC) sa Albay, sa ganap na pagbubukas kan voter’s registration ngonian na aldaw, Agosto 1.
Sa intrevista kan Bombo Radyo Legazpi ki Provincial Elections Supervisor Atty. Maria Aurea Bunao, inimbitaran kaini an mga kwalipikado nang magboto sa 2020 elections na magparehistro na.
Magdara sana suboot nin kopya kan birth certificate an mga edad 15-anyos hasta 17-anyos mantang pig-aako man an valid IDs para sa mga edad 18-anyos pataas.
Segun ki Bunao, bastante an oras na ipigtatao kaya dapat na aprobitsaran asin dae na paghalaton pa an deadline sa Setyembre 30.
Bukas an mga oficina kan COMELEC puon alas-8:00 nin aga hasta alas-5:00 nin hapon, Lunes hasta Sabado kaibanan an mga pista oficial.
Makaag man suboot nin booth para iprayoridad an may mga special needs mantang nakipag-coordinar naman sa mga barangay tangarig na ma-acomodar sa satellite registrations an mga hali pa sa hararayong lugar.
