LEGAZPI CITY- Ongoing man giraray an preparasyon kan Commission on Elections (Comelec) Regional Office 5 sa ibong kan paglusot kan propuesto na pag-oktaba sa barangay asin Sangguniang Kabataan (SK) elections ngonian na Oktubre sa Kamara de Representantes.
Sa intrevista kan Bombo Radyo Legazpi ki Comelec Bicol Regional Director Atty. Ma. Juana Valeza, wara man suboot sindang ibang magiginibo kundi magpadagos sa calendar of activity urog na bako pa man klarado an babasehan kan postponement kan eleksyon.
Dugang pa kaini na madadagos man giraray an filing kan certificate of candidacy sa Setyembre 23 hasta 30 kun dae pa maisasaley an desisyon kan mga lehislador.
Nakatalaan man na ipaotob magin an mga prohibitions sa election period siring kan gun ban asin promotions.
Inako man kan opisyal na apike na an ahensya sa oras asin sayang sana an gastos kan gobierno en kaso madagos an pag-oktaba.
Saro pa sa mga pigrurumdom kan ahensya an magkaibang bersyon kan Kamara asin Senado sa lado kan appointment sa mga barangay officials na pighihiling na magpapahalawig pa sa diskusyon sa bicameral committee.
Sa hudyan, segun sa opisyal kan Comelec, mas marhay man giraray suboot an ‘overprepared’ kesa warang preparasyon sa anuman na posibleng mangyari.
