LEGAZPI CITY – Nagpirma na nin Memorandum of Agreement an Commission on Elections Bicol asin sarong mall sa Legazpi City para sa implementasyon kan Mall Voting Program katakod kan nagdadangadang na 2025 Midterm Election.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na saro ini sa saindang padagos na commitment nganing magkaigwa nin maray na eksperyensya sa pagboto kan mga botante sa provincia.
Istorya niya pa na kan 2022 Barangay and Sangguniang Kabataan Election, an rehiyon Bicol an pinaka-enot na nakasagibo nin matrayumpong pilot testing kan mall voting sa enterong nacion.
Isasagibo ninda an siring kaining inisyatiba asin dudugangan ninda an mga mall na magigin voting centers kan mga kataraid kaining barangay.
Pigtawan doon pa kan opisyal na makakatao ini nin accessible, maray, asin bentilado na pagbobotohan na makakatabang man sa mga senior citizen, bados, asin may mga kamatean huli na man sa piglalaomang paghalangkaw kan heat index kada panahon kan tag-init.
Mabebenipisyuhan man suboot an mga botante kan Barangay Lapu-Lapu kan naunambitang ciudad nin huli ta lilipaton na ninda an saindang mga presinto sa mismong mall.
Paglinaw man ni Atty. Valeza na warang ipapaluwas na budget maski piso an komisyon nin huli ta an mismong mall na suboot an nagsagot kan mga gagaramiton sa paparaning mall voting.
