LEGAZPI CITY — Padiit-diit nang nasosolusyunan kan Philippine Coconut Authority (PCA) Bicol an pamemeste kan cocolisap sa mga niyog sa nagkapirang lugar sa rehiyon.
Alagad inako ni PCA Bicol Division Chief 1 Alvin Trespeces na dae na 100% mahahale an mga ini asin magigin parte na kan mga ibang peste maski pa ngani posibleng hale man sana ini sa mga probinsya kan Basilan asin Isabela na enot na naapektaran na marhay kan cocolisap.
Mientrastanto, ngunyan na opisyal nang idineklarar kan PAGASA an pagpuon kan summer season, nahahandal an PCA na baad liwat maglangkaw an cocolisap infestation.
Ineksplikar ni Trespeces na apwera sa pamemeste sa mga niyog, pigkakaon kan cocolisap an mga pig-aapod na “friendly insects” kun kaya maikokonsidirar talaga ining dakulang problema urog na sa mga coco farmers.
Igwa nin mga lakdang an ahensya ngani na magadan an mga ini arog kan “prawning” o paghale sa dahon kan niyog na apektado kan cocolisap, trunk injection asin iba pa.
Kun babalikan, enot nang nagdeklarar nin all out war an PCA kontra sa cocolisap na enot na nameste sa Basilan asin naglakop sa Albay, Quezon asin CARAGA.
An Basilan an saro sa top coconut producers sa Pilipinas na nakakapagprodusir nin 163.2 million metric tons nin kopra kada taon.
