LEGAZPI CITY—Naka-heightened alert ngunyan an Coast Guard Station Catanduanes katakod kan mga posibleng epekto kan bagyong Basyang.
Segun ki Coast Guard Station Catanduanes Chief of Staff Ensign Jepril Bitas, sa intrevista kan Bombo Radyo Legazpi, naka-activate na an saindang deployable response teams asin padagos an monitoring sa presenteng kamugtakan kan panahon.
Nagkundusir na man sindan nin mga aktidades siring kan pag-briefing sa mga personahes, pag-inspeksyon sa mga rescue equipment, magin an pag-alerto sa iba pang substations para sa tulos na pagresponde sa saindang areas of responsibility kun kinakaipuhan.
Pighayag man kan opisyal na an gabos nindang coast guard stations asin mobile teams an may pigsararong deployable response groups.
Sa presente, nagpapadagos an monitoring kan ahensya sa mga pantalan kan Virac asin San Andres kan nasabing provincia.
Mientrastanto, mahigot man na pigpagiromdoman an mga vessel operator na magsunod sa safety requirements; en kaso man na may direktiba gikan sa state weather bureau an tulos man sinda na magpapaluwas nin sea travel advisory o suspensyon nin byahe para sa kaligtasan kan gabos.
