LEGAZPI CITY— Nagpahayag nin kamunduan an liderato kan Coast Guard District Bicol katakod kan nangyaring pag-ambush sa saindang operations officer asin dating tagapagtaram na si Lt. Senior Grade Archie Hicban.
Nangyari an pananambang mientras na kaibanan kan opisyal an esposa lunad kan saindang pick-up sa Road 10, Tondo, Maynila.
Sa intribista kan Bombo Radyo Legazpi ki Lt Marlowe Acebedo, tagapagtaram kan Coast Guard District Bicol, sinabi kaining naglalaom sinda na tulos na madadakop an mga responsable sa krimen ngani na maaraman kun ano an motibo kan mga ini sa nasambitan na ambush na ikinagadan man kan esposa ni Hicban na si April.
Pigkokondenar man suboot ninda an duwang dae pa nabibistong suspetsado na daeng herak na pinagbabadil an mga biktima.
Si Hicban an station commander kan Coast Guard sa Albay asin nag-aadal sa PCG-Education and Training Command sa Manila para sa promotion bilang Lt. Commander.
Napag-araman na nawalat kan mag-agom na Hicban an saindang solong aki na sienertong makakaresibe nin tabang gikan sa gobyerno.
Mientrastanto, sa ibong kan trahedyang ini, dagos an selebrasyon sa aga kan ika-18 anibersaryo kan PCG Bicol na aatindiran ni PCG officer in charge Commodore Joel Garcia bilang huespe de honor.
