LEGAZPI CITY — (Update) Nilinaw kan Department of Health (DOH) Bicol na dae na kaipuhan pa an pagsulot nin face mask kasunod kan pigsususpetsarang kaso kan meningococcemia sa Cataingan, Masbate.
Segun ki DoH-Bicol regional epidemiologist Dr. Aurora Teresa Daluro, naitao man an proper burial sa 7-anyos na grade 1 pupil na susog sa Presidential Decree 856 o Code Sanitation of the Philippines kun kaya wara na an source kan exposure.
An mga nasa peligro suboot kan pagkakaigwa kaini an mga pig-aapod na “close contact” o an nakaibanan kaini sa harong, asin an nag-ataman sa laog nin apat na magkakasunod na oras.
Alagad segun ki Daluro, natawan naman prophylactic medicines an mga ini tangarig dae na mag-develop nin mga sintomas asin imo-monitor sa sunod na 10 aldaw.
Afuera kaini, kinuwaan naman nin specimen an ibang close contacts na ipapadara man sa Research Institute for Tropical Medicine (RITM). Inanunciar man kan Provincial Health Office (PHO) kan Masbate na warang ipinautob na travel and trade restrictions kasunod kan insidente.
Mientras tanto, preparado man suboot an DOH en kasong magkaigwa pa nin suspected case kan meningococcemia kun sain pinagibo an mga local government units nin Emerging and Reemerging Infectious Disease plan tangarig i-address an sitwasyon.
