LEGAZPI CITY-Padagos na pinagbabantayan kan Armed Forces of the Philippines (AFP) an sarong barkong pandigma kan People’s Liberation Army Navy (PLA-N) asin sarong unmanned surfacing vessel (USV) na suboot nanotaran sa exclusive economic zone (EEZ) kan nacion.
Segun kay AFP spokesperson for the West Philippine Sea, Ret. Rear Admiral Roy Vincent Trinidad, nakikipag-koordinar na an militar sa iba pang maritime agencies ngani maberipika asin matunton an presensiya kan mga nabanggit na barko.
Tinawan doon ni Trinidad na sa ngonian wara man nin banta sa kaligtasan kan publiko o sa national security.
Sa tahaw kaini, pigsierto niya na ipapadagos kan Sandatahang Lakas an pagbabantay asin gigibohon an mandato ngani maprotehiran an maritime interests kan Pilipinas.
Ini kasunod kan nakuang footage kan California-based firm na Seasats kan Hunyo 16, kun sain ipinahiling sa video an sarong Chinese Type 052D guided-missile destroyer.
Basado sa mga reports, nagkaigwa an USV nin serye kan “encounters” sa mga Chinese naval vessel, kaiba an mga Type 052 asin 055 destroyer, asin Type 056 corvette.
Napatunayan man an authenticity kan footage, pagkakakilanlan kan mga barko, asin an lokasyon gamit an data asin original file metadata kan Seasats.
