Nangapudan an China sa Estados Unidos na tulos na palayaon si Presidente Nicolas Maduro kan Venezuela asin an saiyang agom na si First Lady Cilia Flores asin pigduon na dapat resolberan an krisis sa Venezuela sa paagi nin dayalogo asin negosasyon.
Sa sarong pahayag kan Chinese Foreign Ministry, sinabi kan Beijing na dapat seguruhon kan US an personal na kaligtasan ni Maduro asin kan first lady.
Segun sa China, malinaw na pagbalgar sa international law asin pankinaban na standards an pagdakop asin pagdeport sa lider kan Venezuela.
Bilang simbag, ipigdoon kan China na an mga isyu sa Venezuela dapat na resolberan kan mga taga-Venezuela mismo, na warang pakikiaram kan mga ibang nasyon.
Idinoon pa kan Beijing na an matoninong na diyalogo iyo sana an paagi nganing maibalik an katatagan asin kaayusan sa Venezuela.
Kan Sabado, pig-anunsyo ni US President Donald Trump na inarestar si Maduro kasunod kan sarong large-scale strike sa kabisera kan Venezuela, an Caracas.
Kun babalikan, an US haloy nang pigkokonsiderar an liderato ni Maduro na “illegitimate” asin kinasuhan siya nin manlaen-laen na kasong kriminal, kabali na an suboot pagigin lider kan sarong drug cartel.
Kan Marso 2020, inakusaran kan US Department of Justice (DOJ) si Maduro asin nagkapirang halangkaw na opisyales kan Venezuela huli sa suboot pangengenot sa inapod na “Cartel of the Suns” (Cartel de los Soles).
Susog sa DOJ, an grupong ini imbuelto suboot sa darakulang drug trafficking, partikularmente sa paglaog nin cocaine sa Estados Unidos, asin sa pakikipagsabwatan sa mga rebeldeng grupo arog kan Revolutionary Armed Forces of Colombia.
Si Maduro kinasuhan nin narco-terrorism, drug trafficking, asin conspiracy.
Alagad, mahigot na pignegaran ni Maduro an mga akusasyon asin inapod ining politically motivated.
