Centralized 911 sa Legazpi City, pupunan na ngonian na taon

LEGAZPI CITY- Pupunan na suboot sa urog na marikas na panahon an isasagibong upgrade sa centralized 911 kan Legazpi City.
Ini makalihis na pormal nang mabakante an dating opisina kan Land Transportation Office (LTO) Legazpi Branch na gagamiton man bilang opisina kan 911 sa ciudad.
Segun ki Mayor Noel Rosal, nakakaag sa plano na gigibuhong hasta sa tolong eskalon an edificio mantang kaibanan sa mga ilalaog digdi an City Disaster Risk Reduction and Management Office (CDRRMO).
Dugang pa ni Rosal na naka-standby naman an ambulansya na makakatabang sa mga pagresponde sa mga dae piglalaomang insidente mientras na magkakaag man suboot nin live feed an ciudad para sa marikas na pagdiseminar kan mga impormasyon urog na sa mga peryodo kan kalamidad.
Preparado naman suboot magin an mga personahes na ma-asister sa pagpapadalagan kan nasabing pasilidad.
Afuera digdi, nakatalaan na mag-alokar nin dugang P50 milyon para digdi mientras na ma-bid man suboot an ciudad tangarig na mai-pattern sa pasilidad na igwa an Davao City.
Sa ibong na lado, magigin enterong convention facility na an Legazpi City Convention Center (L3C) huli ta hahalion na duman an City Environment and Natural Resources Office (CENRO) siring man an opisina kan Technical Education and Skills Development Authority (TESDA).
Huli digdi, mas magigin mahewas na suboot an parking lot sa nasabing pasilidad.