LEGAZPI CITY—-Sarong Catandunganon an rank 2 sa isinagibong December 2024 Aeronautical Engineering Licensure Exam.
Segun ki Airro King Tatac Robles, an naunambitang rank 2 sa Aeronautical Engineering Licensure Exam, sa intrevista kan Bombo Radyo Legazpi, na labi an saiyang kaogmahan kan siya nakapasar sa licensure exam.
Dugang kaini na siya asin an saiyang tugang nasurpresa kan nahiling na nakalaog ini sa topnotchers huli ta dae man ini naglaom na makalaog pa sa ranking.
Ipigheras man kaini na nadificilan siya sa exam huli kan mga problem-solving asin computation problems na kun saen segun saiya ini an saro sa mga dipisil na eksaminasyon sa saindang kurso, alagad sinabi kaini na nagpreparar siya nin maray, asin nagin kumpiyansa sa saiyang abilidad kaya ini naipasar niya.
Sinabi niya na puon pa kan pagkaaki pangarap niya an magin sarong piloto.
Sa ngunyan mawot niyang magpahingalo muna asin mag-uli sa Catanduanes para maglaan nin oras sa saiyang pamilya.
Plano man kaini sa mga masunod na taon na iheras an saiyang kaaraman asin magtaong giya mapadapit sa nasambitan na licensure exam.
Mientrastanto, sinabi man kaini na an pagkua kan siring na exam kaipuhan na intindihon an mga pigbabasa mapadapit sa aeronautical engineering asin i-enjoy an proseso kan pag-aadal huli ta mas nasasabutan asin naaapresyar pa an siring na lakdang, asin mas nagigin fulfilling sa pagmati pag nakapasar sa board exam.
