LEGAZPI CITY- Enkasong matatawan nin bastanteng supply nin COVID-19 vaccine, posibleng an Catanduanes suboot an magin pinaka enot na provincia sa Bicol region na maabot an herd immunity.
Ini makalihis an magayon na performance kan provincia sa pediatric vaccination.
Segun ki DOH Catanduanes Provincial Officer Dr. Robert John Aquino sa intrevista kan Bombo Radyo Legazpi, an nasa 1,700 na bakuna para sa mga edad 5-anyos hasta 11-anyos an nagdurar sana nin tulong aldaw huli sa kadaklan kan mga kaakian na nagpahayag nin makawotan na magresibe nin COVID-19 vaccine.
Sa presente an kakulangan sa supply nin bakuna an nagigin agyat sa provincia.
Basado sa datos kan ahensya, nasa 89% kan populasyon kan 12-anyos hasta 17-anyos an nabakunahan na mantang 86% na an fully vaccinated sa mga edad 18 hasta59-anyos asin 97% na man sa mga senior citizen.
Napagparaman na padagos pang nadudugangan an mga pediatric population na nagpapalista ngani na magresibe kan COVID-19 vaccine.
Mientras tanto, pighihiling man kan nagkapirang eksperto na posibleng an Catanduanes man pinaka-enot na makaabot kan herd immunity sa luwas kan NCR enkasong matawan nin bastanteng bakuna.
Nagpasalamat kan si Aquino sa mga magurang sa pag-enganyar asin pagpapaliwanag sa saindang mga kaakian dapit sa magayon na epekto kan bakuna ngani na malabanan ang malalang epekto kan COVID infection.
