LEGAZPI CITY — Pigduon kan Department of the Interior and Local Government (DILG) Bicol na dakol pang legal na lakdang na pwedesir na gibuhon si Catanduanes Governor Joseph Cua makalihis an ipinaluwas na suspension order kan Ombudsman.
Ini an katakod kan kasong administrativo na isinunad kan sarong pribadong personalidad kontra sa gobernador.
Segun ki DILG Bicol Director Atty. Anthony Nuyda, nag-ugat an nasambitan na kaso makalihis ipagamit kan gobernador an sarong lote na pagsadiri kan lokal na gobierno sa sarong construction firm na warang permiso kan Sangguniang Panlalawigan.
Pigduon kan opisyal na basado sa eksistidong ley, maski pa warang imbweltong kwarta sa sarong transaksyon, dae pwedesir na ipagamit an anumang pagsadiri kan gobierno sa siisay man na personalidad na warang permiso an SP members.
Mientras tanto, sa ibong kaini, piglinaw ni Nuyda na pwedesir man na maputol an anom na bulan na preventive suspension na ibinaba kan Ombudsman kontra ki Cua.
Makakabalik man sa pwesto an gobernador kun makakapagsumite ini nin Motion for Reconsideration (MR), makakakua nin Temporary Restraining Order (TRO) sa Court of Appeals o kun babawion kan Ombudsman an suspensyon.
