Pig-aprobaran kan Kamara de Representantes sa ikatulo asin huring pagbasa an panukala na magtitindog nin sarong career progression system para sa mga paratukdo sa pampublikong eskwelahan puon elementarya sagkod high school tanganing maging malinaw an promosyon kan mga ini.
Sa botong 197 pabor na boto, pigaprobaran kan Kamara an House Bill (HB) No. 10270 o an “Career Progression System for Public School Teachers Act,” an consolidated version kan HB No. 1580 na pigsurat ninda Tingog Reps. Yedda K. Romualdez asin Jude Acidre asin HB 3554 na ipigsunad ni Batangas Rep. Ralph Recto antes ini naging kalihim kan Department of Finance.
Pinuri ni Speaker Ferdinand Martin G. Romualdez an pagpasar kan panukala na magtataong linaw sa sistema kan promosyon kan mga paratukdo sa pampublikong eskwelahan bilang pagbisto sa saindang kakayanan asin mga piggigibo sa saindang propesyon.
Segun kay Rep. Yedda Romualdez an pangenot na obheto kan HB 10270 an maitaguyod an propesyunal na paglago asin mapagayon an kapakanan kan mga paratukdo sa paagi kan pagtaas kan saindang suweldo tanganing sinda an mas maging matibay na makapagtukdo.
Saro sa pangenot na probisyon kan HB 10270 an pagtatao kan poder sa Department of Budget and Management (DBM) na magkrear sa mga posisyong Teacher IV, V, VI, VII, asin Master Teacher V asin an angkop na pagtaas sa sahod para sa mga ini.
An mga presenteng head teacher an tatawan nin opsyon na magtinir sa saindang presenteng posisyon o magpa-reclassify sa katumbas na posisyon.
Ipinagbabawal kan HB 10270 an demotion kan ranggo o pagbabawas sa sahod, benepisyo, asin iba pang prebelihiyo kan mga presenteng empleyado na maaapektaran sa gigibuhong pagbabago.
An mga paratukdo an dapat na ma-promote base sa ipigtalaan na merito asin sa saindang kakayanan base sa isasagibong Comprehensive Performance Assessment.
An natural vacancy, quota, ratio-and-proportion na paagi kan promosyon an dae na man ikokonsiderar.
Kun makakaresibe nin duwang magkasunod na grade na ineffective an sarong paratukdo kaipuhan ining magsairarom sa remedial program.
An kakaipuhan na pondo an isasabay kan DBM sa taunang budget kan gobyerno, segun sa panukala.
