LEGAZPI CITY – Dakula an kaugmahan asin pasasalamat kan mga delligados kan Probinsya kan Camarines Sur makalihis nindnag mabawi an kampeyonato sa Palarong Bicol 2017.
Marurumduman na kan taon 2015, an parehong probinsya an nakapagbulsa man kan enot na pwesto sa parehong sporting event.
Sa pakikipag-olay kan Bombo Radyo Legazpi sa sarong coach kan Camarines Sur, enot kaining pinasalamat an Diyos sa pagtatao nin giya sa sainda na magin matrayumpo sa aktibidad.
Dugtang pa kaini na napahibi sinda sa labing kaugmahan asin nagpasalamat man sa magayon na performance na ipinahiling kan saindang mga atleta na iyo an nagrepresentar sa saindang probinsya.
Segun digdi, dae suboot nasayang an pirang bulan na saindang pagpapagal huli na man ta magayon an nagin resulta kan saindang kawat.
Pigkokunsiderar man kan nsambitan na coach na an Palarong Bicol an sarong paagi ngani na madiskubre an talento kan mga joven asin saro ining aktibidad ngani na magkaburunyog an bilog na Bicol Region.
Pigsiyerto man kaini na magkakaigwa nin selebrasyon an mga deligados hali sa Camarines Sur bilang pasasalamat na man sa saindang pagkagana.
