LEGAZPI CITY- Nauli sa engkwentro an ikinasar na buy bust operation kan mga otoridad sa Barangay Gahonon, Daet, Camarines Norte.
Binisto an target kan operasyon na si Menandro Ariate alyas “Dodoy” sarong high value target na residente kan nasabing lugar.
Segun sa report kan Daet Municipal Police Station, haloy ng pinagmamanmanan kan mga otoridad an hiro kan suspek na saro suboot sa supplier nin iligal na droga sa lugar.
Nakipag-ulay sa target an sarong pulis na nagpanggap na buyer hasta sa mapatugot ining makipaghilingan sa lugar kung kaya ikinasar na an buy bust operation.
Nakapagpabakal an drug personality nin sarong medium sized sachet nin pinagtutubudang shabu na nagkakantidad nin nasa P30,000.
Alagad makalihis an transaksyon asin kan aarestaron na si Ariati, nagbalo ining manlaban asin nagpaputok nin badil rason nganing magbalos man nin putok an mga pulis.
Lugadan an suspek na tulos na dinara sa ospital asin sa ngunyan pigsangatan na nin kasong pagbayolar sa Acta Republika numerado 9165 o an Comprehensive Dangerous Drugs Act of 2002.
