LEGAZPI CITY – Makalihis an haros sarong oras, naisalbar na paluwas sa sarong baklad sa kadagatan kan Barangay Tinapian sa Manito, Albay, an sarong butanding na may labang 7 metro.
Mga maninisid hale sa Bureau of Fisheries and Aquatic Resources (BFAR) kan Department of Agriculture an nagtabang-tabang ngane mapaluwas ini.
Segun sainda, kan nakaagi pang aldaw nahiling sa laog kan baklad an butanding.
Posible suboot na nakalaog ini huli sa nanginginain ini sa lugar.
Kadakol kayang saradit na sira sa lugar na pagkaon kan mga butanding.
May nahiling man an grupo na 2 fish hook na nakatusok sa butanding, na saindang hinali antes buhian an hayop sa baklad.
Bako suboot ini an enot na bes na may nadakop na butanding sa lugar kaya pangapudan kan BFAR, tulos na sabihon sainda kun enkaso liwat mangyari an parehas na insidente.
