LEGAZPI CITY – Pig-omaw kan Bureau of Fire Protection an isinagibong rescue operation kan saindang mga personel sa sarong personang nahulog sa hirarom na kalot sa kabuludang parte kan Barangay Lamba, Legazpi City.
Segun ki Legazpi City Fire Station chief operation Senior Fire Officer 4 Garry Santander sa intrevista kan Bombo Radyo Legazpi na nakaresibi sinda nin report na may nahulog na persona sa hirarom na kalot asin tulos sinda nagdeploy nin personahes nganing magsagibo nin rescue operation.
Napagalan an saindang mga rescue personel huli sa rarom kan hinulugan kun kaya kinaipuhan na babaon kan rescuer an nasambitang kalot nganing makuwa an biktima.
Susog man sa saindang inisyal na report inabot man nin saro may kabangang oras an isinagibong operation asin tulos na naidara sa pinakaharaning hospital.
Nagpasalamat man an opisyal huli ta warang nalugadan sa saindang rescue force asin nagpromesang permi sindang handa basta syertuhon sana suboot na amay an pag-apod sa sainda nganing tulos na madumanan an mga ini.
Dugang niya man na eksperto an saindang team sa siring kaining operation huli ta nagsairarom sinda sa training mapadapit sa mga kapareho kaining scenario.
Dakulang bagay man suboot an pakikipagtabangan kan mga opisyales kan Barangay Lamba para sa marikas na pagrescue sa biktima.
Pangapodan ni Santander sa gabos na mag-ingat sa saindang mga lugar na pigdudumanan urog na kun dae ninda kabisado an saindang pigpapasyaran.
