LEGAZPI CITY-Padagos an effusive eruption asin minor strombolian activity kan Bulkang Mayon susog sa Philippine Institute of Volcanology and Seismology (Phivolcs).
Segun kay Phivolcs Monitoring and Eruption Prediction Division Chief Mariton Bornas, sa intrevista kan Bombo Radyo Legazpi, na padagos an pagluwas kan lava na nagke-krear nin pyroclastic density currents asin rockfall hale sa pagguho sa taas kan Bulkan.
Padagos man na naglalawig an lava flow hale sa crater sa Mi-isi, Bonga, asin Basud gullies asin nairehistro na 310 rockfall events, pitong pyroclastic density currents, 20 volcanic earthquakes asin pitong ash emission events.
Pinaliwanag ni Bornas na an minor strombolian events o activity, iyo an pagpisik kan lava hale sa bulkan huli sa mga bubbles kan volcanic gas na nag-rupture asin nagigin mitsa kan lava spray.
Sa presente, sinabi kan opisyal na panaka-naka an pagbuga nin lava kan Bulkang Mayon, asin sa ngonian warang indikasyon nin explosive eruption huli sa warang pagbabago sa monitoring sa mga parametro kaini.
Mientrastanto, pigsierto kan Phivolcs na dai maapektaran an ciudad kan Legazpi kun sain presenteng pigsasagibo an Palarong Bicol 2026, alagad pinagiingat man liwat sa posibleng peligro kan pagguho kan lava asin ashfall.
