LEGAZPI CITY- Inihayag kan Albay Public Safety and Emergency Management Office (APSEMO) na magtitinir sa Alert level 1 an Bulkang Mayon hasta sa dae pa nagbababa an mga nahihiling na mga aktibidad digdi.
Sa intrevista kan Bombo Radyo Legazpi kay APSEMO head Dr. Cedric Daep, padagos pa man an nairereport na halangkaw na emission nin sulfur dioxide sa bunganga kan bulkan na indikasyon na may nabibilog pang pressure sa irarom kaini.
Dae pighahali ni Daep an posibilidad na ilangkaw pa an alerto sa bulkan depende na sana sa magiging aktibidad kaini sa mga masunod na aldaw.
Mahigot an patanid kan opisyal sa mga residentes na ibitaran nanggad an paglaog sa 6km permanent danger zone kan bulkan huli ta maski na nasa alert level 1 pa sana yaon man giraray an posibilidad nin pagsabog kaini anuman na oras.
Idagdag pa diyan an huma kan posibleng rockfall event o pagrasay kan mga volcanic materials na natipon sa taas kan bulkan siring man an lahar flow ngunyan na tag-uran.
Pangapudan ni Daep sa publiko na magsunod sana sa mga pigpapaluwas na abiso kan mga otoridad asin tulos na mag-ebakwar en kasong maglala pa an sitwasyon ngani na makalikay sa mga dae pinaglalaoman na insidente.
