LEGAZPI CITY – Nakapagrehistro nin 158 na volcanic earthquakes an bulkang Bulusan sa nakalihis na 24 oras na obserbasyon.
Segun ki Philippine Institute of Volcanology and Seismology Bulusan Volcano Observatory Resident Volcanologist April Dominguinao sa intrevista kan Bombo Radyo Legazpi na nagkaigwa man na 72 tons/day na sulfur dioxide emmision mantang nagkaigwang makusog na pagsingaw na may langkaw na 100 meters na pigtatalyap sa northern side kan nasabing bulkan.
Padagos man an pagkakaigwa nin paghubag kun kaya nagtetenir sa Alert level 1 asin pigpapalikay an publiko sa paglaog sa 4km permanent danger zone asin sa 2km extended danger zone sa southeast sector kan bulkang bulusan.
Sa mga nakalihis na mga semana, narisa ninda na pabago-bago an mga nairerehistro nindang aktibidad kan bulkan kada aldaw kun kaya mas kaipuhan suboot an pag-iingat kan gabos.
Pigtaram pa kan opisyal na wara man giraray na pagbabago mapadapit sa mga regulasyon asin preparado an mga otoridad enkaso magkaigwa liwat nin pagsabog an bulkan.
Kun hihilingon man an mga parametro, padagos suboot an abnormalidad kan bulkan kun kaya dae pa ninda masabi kun nuarin ibababa an alert level 1 pasiring sa alert level zero.
Dae man suboot pighahale an posibilidad na magkaigwa nin lahar flow enkasong magputok an bulkan mantang nag-uuran o pigrarapado kan bagyo an nasabing provincia.
Pagirumdom ni Dominguinao na kaipuhan man liwat an pag-iingat kan mga naka-istar harani sa palibot kan Bulusan Volcano urog nang nagkakaigwa ini nin pabago-bagong aktibidad.
