LEGAZPI CITY-Nagpatanid an Bangko Sentral ng Pilipinas (BSP) sa gabos na BSP-Supervised Financial Institutions (BSFIs) na pakusugon an saindang lakdang laban sa money laundering, terrorism financing, asin proliferation financing katakod kan mga kliyenteng imbuelto sa casino junket operations (CJO).
An casino junket operations an mga kumpanya o indibidwal na nag-aayos kan gaming-related services para sa mga high-value patrons, kaibanan an travel arrangements, pagpapasubli kan kredito, asin booking kan mga gaming room.
Sa ipinaluwas na guidance paper na may titulong “Risk Management Practices for Customers Engaged in Casino Junket Operations”, naglatag an BSP kan mga regulasyon ngani maibitaran an paggamit kan BSP-Supervised Financial Institutions bilang daluyan kan ilegal na transaksyon siring kan money laundering, terrorism financing, asin iba pa.
Kaiba sa mga tinukoy na red flags an bako pangkaraniwang paghiro kan kwarta, komplikadong ownership structures kan mga corporate clients, asin layered transactions.
Nabanggit kan ahensya na an mga transaksyong igwang kinaaraman sa casino junket operations, igwang halangkaw na peligro na magamit sa money laundering.
Inirekomenda kan dokumento an pagpapakusog kan risk management sa limang pangenot na lado; pamamahala kan borad asin senior management, pagpapaotob kan money laundering asin terrorism financing prevention program, mabusising client acceptance asin identification, padagos na monitoring asin suspicious transaction reporting, siring man an regular na self-assessment asin training.
Tinawan doon kan BSP na importante an information sharing sa pagultanan kan mga supervising authorities, partikular an BSP asin Philippine Amusement and Gaming Corporation (PAGCOR), kaiba an BSP-Supervised Financial Institutions ngani mas epektibong malikayan an peligro.
