LEGAZPI CITY—Padagos na ipigpapaotob kan Albay Veterinary Office an border control measures para maibitaran an paglakop kan African Swine Fever (ASF) sa probinsya.
Segun ki Dr. Pancho Mella, an pamayo kan Albay Veterinary Office, sa intrevista kan Bombo Radyo Legazpi, na an saindang opisina padagos na nagbabantay sa pagluwas o paglaog nin mga hayop sa nasambitang lugar.
Pigtaram kaini na igwa sindang mga nagkapirang checkpoint siring sa banwaan kan Tiwi—lalo na sa Camarines Sur-Tiwi border, sa Polangui—partikular na sa Bato-Agos border; sa parte kan Bombon sa banwaan nin Libon; magin sa Pioduran port; asin sa Daraga partikular na sa Sorsogon-Albay border.
Mientrastanto, pigtaram kan opisyal na kairiba ninda sa pagpaotob kan mga lakdang an mga lokal na gobyerno sa naunambitang mga lugar.
