LEGAZPI CITY — Pighahalat pa sa ngonian an resulta kan isinagibong laboratory test sa nadiskubreng panibagong bloke kan pigtutubudang cocaine sa kadagatang sakop kan banwaan kan Rapu-Rapu, Albay.
Sa intrevista kan Bombo Radyo Legazpi ki P/Capt. Dante Bonafe, hepe kan Rapu-Rapu Municipal Police, nakua kan tulong parasira an nasabing bloke na nagpapataw-pataw sa dagat harane sa boundary kan Prieto Diaz, Sorsogon.
Binisto an mga parasira na sinda Nilo Aguilar, 38, na saro man na tanod; Joy Dungaran, 42; asin si Joven Cambi, 24 na anas residente kan Barangay Sta. Barbara.
Segun sa mga ini, nakasabit sa “palutang” o net na pansira an nasabing bloke.
Dugang pa ni Bonafe, wara man na markings an bloke bakong siring kan mga naenot na narekober huli ta hinali na kan mga parasira an patos sa pagpensar na kwarta an laog.
Pigtutubudang nasa poco mas o menos sarong kilo an timbang kan bagay.
