LEGAZPI CITY- Padagos ngunian an pagsasagibong lakdang kan Bureau of Jail Management and Penology Bicol para mapababa an congestion rate sa laog kan mga jail facilities.
Sa ngunian kaya nasa 121% an kabilogan na congestion rate sa Bicol alagad kun ikukumparar suboot an bilang na ini, mas hibaba na ini kaysa kan nakalihis na mga taon.
Segun kay JO3 Ruth Castor an Community Relations Service Officer kan Bureau of Jail Management and Penology Bicol, igwa sindang nasa 3,445 persons deprived of liberty (PDL) na pigmomonitor kan saindang mga nurses asin doctor para sa saindang health conditions lalo na kun mainit an panahon.
Segun pa sa opisyal na kan nakalihis na tag-init naglangkaw suboot an kaso kan mga hypertension asin pagtaas kan blood pressure kan mga PDL alagad namanihar man ini kan saindang mga health workers.
Mientrastanto, nagpaluwas naman nin memorandum an hepe kan Bureau of Jail Management and Penology dapit sa kasuguan na kaipuhang mag comply an saindang mga pasilidad dapit sa pagpreparar ngunian naman na tag-uran.
Sa ibong na lado, pig-ingganyar kan opisyal an publiko na makisumaro sa saindang gigibuhon na BJMP family zumba asin fun run for a cause sa Sawangan Park Legazpi City sa maabot na petsa 24 ngunian na Agosto.
Saro sa obheto kaini na matabangan an saindang mga pag-iriba na kasabay sa mga naging biktima kan CAL Courtyard explosion sa Legazpi City.
