Nakapagrehistro an Bureau of Internal Revenue (BIR) nin 19 na pagbalga sa pigsasagibong nationwide Tax Compliance Verification Drive na ginibo kan Oktubre 7, bilang parte kan pinakusog na kampanya kontra sa mga ilegal na vape.
Basado sa datos, nagluwas man an ahensya nin 18 apprehension slips sa ginibong operasyon.
Ini parte kan paghihingoa kan BIR na masiguro na an mga negosyo nagsusunod sa mga regulasyon sa buwis asin tanganing masimbagan an pagpabakal nin mga produkto na dai nagsusunod sa mga eksistidong patakaran.
Dai pig-espesipikar kan report an total na halaga kan mga produktong sakop kan operasyon o an mga masunod na lakdang na dapat gibohon manungod sa mga nairehistrong pagbalga.
