LEGAZPI CITY—Nagpagiromdom an grupong Bicolana Gabriela lalo na sa mga kajovenesan na dae paglingawan an diwa kan EDSA People Power Revolution ini katakod kan ika-39 anibersaryo kan People Power Revolution sa nacion.
Segun ki Bicolana Gabriela Regional Coordinator Nica Ombao, sa intrevista kan Bombo Radyo Legazpi, na dae magigin posible an People Power Revolution kun wara an presensya kan mga kajovenesan.
Pigtaram kaini na an pinaka-backbone dati kan People Power Revolution an mga kajovenesan huli ta sinda an mga masigasig na organisador, kampanyador, asin ano pa man na paagi ngani mapahiling an saindang pakikibaka.
Kaipuhan man suboot na magtindog an mga kajovenesan huli ta kun dae ninda ipaglalaban an mga karapatan na igwa ngunyan asin man an mga karapatan na dapat nindang maresibi—an mga masunod na henerasyon dae maaabutan an tultol na mga lakdang.
Kun kaya ano man na libertad o demokrasya na igwa ngunyan utang suboot ini sa mga naenot nang mga indibidwal asin grupo na nakipaglaban sa batas-militar asin People Power Revolution.
Nagmamawot man si Ombao na hilingon an magigin kapakanan kan mga masunod na henerasyon sa paagi kan padagos na pakikipaglaban sa mga karapatan asin demokrasya kan lambang saro.
