LEGAZPI CITY-Dai man maapektaran kan Tropical Depression Salome an rehiyon Bikol alagad Easterlies an magdadara nin pag-uuran sa rehiyon tuyong hapon o banggi susog sa pahayag kan state weather bureau.
Segun kay Weather Specialist Christian Allen Torevillas, sa intrevista kan Bombo Radyo Legazpi, presenteng naghihiro an Tropical Depression Salome pasiring sa West Southwest sa sirangan kan Taiwan.
An sentro kan nasabing bagyo an nasa rayong 215 km sa North Northeast kan Itbayat, Batanes, asin may kusog an paros kaini na nasa 55 km/h asin pagbugso na nasa 70 km/h.
Naghihiro an bagyo sa rikas na nasa 10 km/h asin posibleng maglandfall sa Batanes ngonian na banggi.
Nakataas man an Tropical Depression Signal No. 1 sa nagkapirang lugar sa Luzon kairiba an Batanes, western portion kan Babuyan Islands (Calayan Island, Dalupiri Island), asin an northwestern portion kan Ilocos Norte (Bangui, Pagudpud, Burgos, Pasuquin, Bacarra, Laoag City).
Mientrastanto, magdadara an Easterlies nin pagkulog asin pagkidlat sa hapon asin banggi sa kabikolan.
Laoman man suboot an maulap na kalangitan asin rain showers sa rehiyon Bikol.
Dugang pa kan weather specialist na afuera sa magayon na panahon an magdadara man an Easterlies nin pag-uuran asin pagdaguldol tuyong hapon o banggi sa kabikolan.
Abiso sa gabos na mag-antabay sa mag ipigpapaluwas na impormasyon sa saindang website asin magdara nin payong bilang pang-ulang sa init asin mga pag-uuran.
