LEGAZPI CITY — Naglalaom an mga lokal na opisyal kan banwaan kan Daraga sa Albay na magigin operational asin magagamit na kan mga bibisita sa provincia an ipigko-construir na Bicol International Airport sa Brgy. Alobo sa taong 2020.
Ini makalihis an makapirang beses na pagka-oktaba kan target date of completion kan proyekto na pinunan kaito pang taong 2006 sa irarom kan liderato ni dating Albay Governor asin presenteng Cong. Joey Salceda.
Katakod kaini, inengganyar ni Daraga Mayor Carlwyn Baldo sa isinagibong meeting sa pulisya na pahiguton an mga ipinapaotob na security measures sa construction site kun saen nairehistro an nagkapirang kaso kan harassment kan mga pigtutubudang miyembro kan local communist terrorists.
Ipigduon man kan alkalde na dakulang pagbusol sa ekonomiya kan banwaan an magigin resulta kaini en kasong magamit na mantang maiaangat man an numero kan arrival kan mga foreign asin domestic tourists.
Mientras tanto, nagpahayag man nin suporta sa lakdang an Daraga Municipal Police, Albay Provincial Mobile Force Company siring man Aviation Security Group mantang madugan man kan deployed personnel sa pag-asegurar kan seguridad, bako sana kan ipigko-construir na erpuerto kundi an mga residente sa luwas kaini.
Magigirumduman na taong 2016 kuta an pagbubukas kaini na naudlot huli sa nagkapirang nangyaring kariribukan siring na sana kan panunulo sa mga heavy equipment siring man sa paghahalat sa kabilugang pondo kan airport.
