Naka-full force na ang Bureau of Immigration (BI) ngunyan na paparani an pagruso kan mga biyahero para sa 2026 Semana Santa, kun sain rinibong pasahero an piglalaomang mabiyahe pauli kan saindang mga probinsya o nganing magbakasyon.
Susog sa ahensya, pigkarkulong maabot sa 45,000 international departing passengers an maagi uroaldaw sa mga pangenot na eropuerto sa nacion sa kasagsagan kan Holy Week exodus.
Sinabi ni BI Commissioner Joel Anthony Viado na nagdugang na an ahensya kan mga frontline personnel asin support units nganing masierto an maayos asin marikas na proseso sa mga eropuerto.
Inabisuhan man kan ahensya an mga pasahero na mag-abot sa airport nin dae mababa sa tulong oras bago an saindang flight nganing malikayan an abala.
Afuera digdi, liwat na pinagiromdoman kan ahensya an publiko na libre an pagpaparehistro sa eTravel platform. Pigtawan-doon man kaini na an mga website na nagsisingil asin nagpapanggap na opisyal na eTravel site kan gobierno an mga nanloloko o sarong fraud site.
