LEGAZPI CITY – Ipigsairarom na kan Bureau of Fire Protection sa imbestigasyon an nasulong barko na barko sa Barangay San Isidro, Sto. Domingo, Albay.
Segun ki Bureau of Fire Protection Albay Provincial Fire Marshall Fire Superintendent Jerickson Miraflor sa intrevista kan Bombo Radyo Legazpi na basado sa saindang inisyal na imbestigasyon an nagpoon an kasulo sa kitchen area kan barge asin nadamay sagkod an engine room kan barko.
Nailigtas man an haros 20 sa mga crew kaini alagad duwang crew an nagsapo nin mga minor burn asin tulos na idinara sa hospital para sa pagpapabulong.
Uminabot sa second alarm an nangyaring kasulo kun sain kinaipuhan ninda an kadugangang tabang hale sa mga fire station man kan kataraid na lugar huli ta dakula na ini bago pa mag-abot an saindang mga personahes.
Pigtaram pa kan opisyal na naideklara man ining fireout makalihis an labi duwang oras alagad nagin pahirapan an paglaog kan mga bombero sa mismong barko huli sa hibog kan aso.
Sa presente wara pa sindang ipigpapaluwas na datos mapadapit sa kantidad kan danyos kan nasulong barko mantang nakikipagkoordinar na sinda sa may kagsadiri kan behikulo nganing aramon kun ano an sakay kaini kan oras na mangyari an kasulo.
Sa kabilugan, ini pa sana suboot an enot na kasulong nairehistro ninda na kina-imbweltuhan nin mga water vessel ngonian na taon.
Pagirumdom ni Miraflor sa publiko na magin rigmat sa mga piggigibo arug kan pagluluto asin dae ipagpasipara an mga wire na may gasgas na huli ta ini an numero unong kawsa kan kasulo.
