LEGAZPI CITY- Liwat na nagpagirumdom an Bureau of Fire Protection (BFP) na maglikay ngani na maibitaran an ano man na insidente nin kasulo.
Sa pahayag ni FCI Gary Lunas kan BFP Legazpi, sinabi kaini na maski bago an ekipahe kan ahensya, mangyayari man giraray an kasulo kun dae magigin responsable an lambang indibidwal.
Puon kan Enero hasta Pebrero ngunyan na taon, nakapagrehistro an BFP Legazpi nin pitong fire incidents sa syudad kun sain tulo an pigkokonsidirar na darakula.
Tinawan duon ni FCI Lunas an kasabihan na “prevention is better than cure” na uru-utrong patanid ninda sa mga kahimanwa.
Mientrastanto, ipigheras man kan opisyal na nakabakal sinda nin duwang bagong fire truck na dugang sa limang may edad nang rescue vehicle.
An koleksyon suboot sa Fire Safety Inspection Certificate sa mga negosyo an saindang pigagamit ngani na makabakal nin mga bagong ekipahe.
Pagirumdom pa ni Lunas na dae matatawanan nin business permit an ano man na negosyo kun dae muna maagi sa BFP.
