LEGAZPI CITY—Padagos an pagbarewas kan Bureau of Fire Protection Albay nin mga suplay nin tubig sa mga evacuation centers huli kan nagpapadagos na pag-alburoto kan bulkang Mayon.
Segun ki Albay Provincial Fire Station Fire Marshal Fire Superintedent Jerickson Miraflor, sa intrevista kan Bombo Radyo Legazpi, na igwa sindang pigkundusir na water assistance sa mga evacuation centers sa banwaan nin Malilipot, Guinobatan magin sa Tabaco City.
Naka-duty man an saindang mga personahes sa mga evacuation centers nganing magreparo para sa fire safety digdi asin magtaong asistensya para sa mga evacuees.
Dugang kan opisyal na preparado man an saindang ofisina na mag-deploy nin kadugangang firetrucks en kaso kinakaipuhan ini kan mga lugar na igwang may pig-ebakwar na mga residentes.
En kaso man na maghalangkaw an alert level kan bulkan an mahagad sindang tabang sa BFP regional office nganing an ibang kataning na provincia siring kan Camarines Sur asin Sorsogon an makapagdara man nin firetrucks asin personahes sa Albay.
Mensahe kan opisyal sa mga residenteng nagtitinir sa evacuation areas na pagsiertohon an pag-obserbar kan fire safety nganing malikayan an anuman na insidente nin kasulo.
