LEGAZPI CITY – Tinaan duon kan Bureau of Fisheries and Aquatic Resources (BFAR) Bicol na warang relasyon an pagluwas kan mga lamang-dagat siring kan oarfish sa nangyayaring linog sa nasyon.
Segun ki Nonie Inolva, tagapagtaram kan BFAR- Bicol, warang pwedesir na ikumparar sa anuman na ekipahe na nakakadeterminar sa pag-abot kan nasambitan na kalamidad.
Nagtutubod an opisyal na sensitibo an mga sira na ini kumpara sa land animals kun kaya nagtetenir sa irarom kan kadagatan alagad nagpapasiring man sa ibabaw ngani na magbalad na pigdadara minsan kan ukol.
Mientrastanto, pighali man kaini an pagkahandal kan mga taga-Sorsogon makalihis na mgkaigwa nin mga lamang-dagat na naglataw kun sain ipighayag ni Inolva na sa presente dae ninda madeterminar an rason kaini alagad posible suboot na nabanwit man sana ini.
Ipigheras man kan opisyal na huring nanotaran an oarfish sa West coast sa Albay kan nakalihis pang Disyembre 2015 alagad dae man nagkaigwa nin paglinog.
Mientrastanto, kinakaipuhan man suboot na pakusugon an ecological management plan ngani na mabawasan an mga basura sa kapalibutan.
Dugang pa kaini, makakaresibe nin onra sa Malacañang an mga lugar na igwang pinakamalinig na kadagatan sa bilog na Pilipinas.
