LEGAZPI CITY- Target kan lokal na gobierno kan Legazpi City na maitao an best Palarong Bicol sa historya katakod kan hosting kan ciudad sa nasabing sporting event.
Marurumduman na mapuon na an Bicol meet sa maabot na Marso.
Segun ki Legazpi City Mayor Alfredo Garbin sa intrevista kan Bombo Radyo Legazpi na nagpirma na man nin Memorandum of Agreement an lokal na gobierno asin Bicol University para sa paggamit kan mga sports facilities.
Napag-araman na nasa P17 million an itatagamang pondo para sa nasabing aktibidad.
Kaibanan digdi an kantidad na gagamiton para sa pagbakal nin bagong sports equipment.
Paliwanag kan alkalde na mawot ninda na magkaigwa nin sadiring mga sports equipment an ciudad ngani na dae na masubli an mga atleta asin magagamit pa durante kan saindang mga trainings.
Naglalaom man si Garbin na sa paagi kan Palarong Bicol 2025, mas makusog pa an ekonomiya kan ciudad urog pang nasa 16,000 hasta 17,000 an pigkakarkulong maatendir sa aktibidad kaibanan na an mga delegado asin mga bisita.
