LEGAZPI CITY- Tinawan na nin honra kan Department of Health Bicol an mga piling evacuation centers sa Albay na namantinir an kalinigan kan lugar durante kan pagtitinir kan mga evacuees.
Sa sarong pagtitipon na pinanginotan kan DOH Bicol, pinangaranan na an mga maswerteng evacuation sites na napili para sa saindang “Search for Best Evacuation Center with the Sanitation Practices”.
Para sa first category na may 500 na mga pamilya nin evacuees napili an Buraguis Elementary School na nakaresibe nin P15,000.00.
Pinangaranan man para sa second category an Villa Hermosa Elementary School na may P30,000 na papremyo mantang nakua an third category kan Guinobatan Weast Central School na tinawan kan ahensya nin P45,000.
Kamawotan kan nasabing aktibidad na bistohon an mga lugar na nagsirbeng panalmingan para sa pangangatamanan kan kalinigan maski na ngani sa panahon nin kalamidad.
Magigirumduman na durante kan pag-aalburuto kan Bulkang Mayon kan iprenomesa kan ahensya an manungod sa nasabing programa.
