Kinumpirmar kan Benguet police na nagadan si dating Department of Public Works and Highways (DPWH) Undersecretary Catalina Cabral makalihis na madukayan sa hararom na parte kan Kennon Road sa Tuba, Benguet kan Huwebes nin banggi.
An cellphone asin gadgets ni Cabral, isinugo kan Ombudsman sa pulisya na i-“secure.”
Nakuwa an lawas ni Cabral na enot na idineklarang “unconscious and unresponsive” sa may rarom na 20 sagkod 30 metro, asin harani sa Bued River, pirang oras makalihis suboot an saiyang driver na iwalat siya sa Kennon Road.
Mantang pigimbestigaran pa an rason kun pano siya nahulog, naglataw sa paenot na pagsisiyasat kan mga otoridad na nasa Kennon Road si Cabral asin driver kaini pasado alas-3 nin hapon pasiring sa La Union.
Alagad pinapundo suboot ni Cabral ang behikulo sa Maramal, Camp 5, Camp 4, asin nagpawalat.
Kan balikan kan driver si Cabral pasado alas-5 nin hapon, dae na niya ini mahiling.
Pasado alas-7 nin banggi kan magpatabang na an driver sa mga awtoridad nganing hanapon an dating opisyal.
Si Cabral an pigtukdong nasa likod kan pig-aapod na “allocable,” sa pagtagama nin pondo para sa mga lehislador na inilaan sa flood control projects na suboot ginamit sa katiwalian.
Kabale si Cabral sa mga dating opisyal kan DPWH na inirekomenda kan Independent Commission for Infrastructure (ICI) na kasuhan katakod kan suboot maanomalyang flood control projects.
