LEGAZPI CITY – May personal na dae pagkakasinabutan an pighihiling na rason kan personahes kan Pilar Municipal Police Station sa probinsya kan Sorsogon katakod kan nangyaring panggagadan kan bantay dagat member sa sarong parasira.
Segun ki PC/Insp. Ruel Pedro, hepe kan nasabing hepatura, nakaolay ninda an parientes kan biktima asin sinabing haloy ng may dagit an biktimang si Jose Lupango sa suspek na si Carvic Lorda.
Pinunan suboot kaini an sumbong o usip kan daragitang aki ni Lupango na pigpapahiling siya kan ikinabuhay kan suspek kun kaya kada mabubuyong an biktima, nagsusugod suboot ini sa harong ni Lorda.
Alagad segun sa residentes kan Barangay Inapugan, may psychological problem an suspek.
Kan mangyari man an insidente, nakainom an biktima asin sinugod an suspek alagad naenotan an biktima asin binadil ini gamit an improvised sumpak asin ginilitan an liog gamit an darang sundang kan biktima.
Makalihis man suboot an insidente, nagdulag an suspek kaiba an agom asin saiyang duwang aki.
Sa ngunyan, nakikipag-kooperar na an kapulisan sa mga otoridad ngane na ma-contact an suspek asin pasurenderon ini.
Dugang kan hepe, posible man na mahampang an suspek sa kasong homicide.
