LEGAZPI CITY – Nakuwa sa banwaan kan Matnog sa provincia kan Sorsogon an bangkay kan 46 anyos na babaying nalamos sa banwaan kan Bulusan sa kaparehong provincia.
Magigirumduman na kan Enero 5, nalamos an babayi mantang nagkakarigos sa sarong Beach Resort sa Bulusan.
Segun kay Patrolman Nikko Brizuela Furing kan Matnog Municipal Police Station sa intrevista kan Bombo Radyo Legazpi na nadukayan an bangkay na nagpapataw pataw sa dagat na sakop kan Barangay Tikling, Matnog, Sorsogon.
Nahiling an bangkay kan mga personahes kan Coastguard asin tulos na pig-impormar an Matnog Municipal Disaster Risk Reduction Management Office na tulos nakipag-koordinar sa saindang hepatura.
Napag-araman na iyo an bangkay kan nalamos na biktima nin huli ta kinumpirmar ini kan saiyang agom.
Pigtaram pa ni Furing na nagsagibo nin necropsy an mga investigator asin nahiling na warang foul play na nangyari sa pagkagadan kan biktima asin dae naman nagpa-imbistiga an pamilya kani.
Nagpagirumdom giraray an mga otoridad sa publiko lalo na an mga turista na nagpapasyar sa saindang provincia na mag-ingat, bantayan an gabos na miyembro kan pamilya asin magin alerto pirmi sa mga baybayon nganing maibitaran an siring kaining insidente.
