LEGAZPI CITY– Ipighahanda na ang kasong isasangat kontra sa lalaking nanaksak sa sadiring bayaw sa Purok 2 Barangay Bariis, syudad kan Legazpi.
Sa isinagibong imbestigasyon kan mga nagrespondeng tauhan kan Legazpi City Police, nagluluwas na nangyari an krimen sa mismong harong kan biktima na binistong si Romeo Nuyda na sarong balo.
Sinugod suboot ini kan bayaw na si Manuel Nacion huli sa pagputol sa kuryente na nagsu-suplay sa harong kaini na nagresulta sa maiinit na ribayan nin taramon sa pagultanan kan duwa.
Digdi na nagbulnot nin sundang an biktima asin tinigbas nin pirang beses an suspek alagad dae man ini natamaan.
Nakabalos si Nacion na armado palan nin kutsilyo asin pinagsasaksak si Nuyda na nagsapar nin mga lugad sa toong kamot, payo asin walang tulak.
Tulos man na nag-uli sa saiyang harong an suspek na dara an sundang na ginamit kan biktima.
Mientrastanto, sarong concerned citizen an boluntad na nagdara ki Nuyda sa ospital ngani na mabulong an mga sinapar na lugad sa hawak mantang nagsurindir an bayaw kaini sa barangay kapitan kan Bariis na si Geremias Leron Jr.
Kabale man na isinurindir kan suspek an kutsilyo na may labang poco mas o menos 17 pulgada asin sundang na 22 pulgada an laba.
Sa presente, padagos pang pig-oobserbaran sa Bicol Regional Teaching and Training Hospital (BRTTH) an nasambitan na biktima.
