LEGAZPI CITY – Dae na nakasalbar pa sa kagadanan an sarong babayi hali sa P-1 Brgy. Binitayan, Malilipot, Albay makalihis na mahulugan nin dakulang bato mantang naga trabaho sa quarrying site sa nasambitan na lugar.
Segun sa testigo na nabistong si Roel Cabrera, naga sideline suboot an mag-agom na sinda Jocelyn asin Danilo Magallon harani sa Ilog Bulawan bilang small-time gravel and sand seller na materyales sa pagibo nin harong.
Maugma pa suboot na nagtatabang an babayi sa agom kaini sa pagpurot nin bato na pigpipidaso kan mga ini.
Nagsakat pa suboot an agom na lalaki sa itaas na parte kan lugar asin pigtaraman an biktima na humali sa ibaba alagad garing dae suboot nadangog ni Jocelyn an abiso kan agom.
Pirang minuto na makalihis na magtrabaho si Danilo alagad sa dae piglalaoman na insidente, buminagsak an duwang darakulang bato sa mismong pwesto kan babayi.
Sa langkaw kan pinaghalian kaini na maabot sa tulong metro, ipigdeklarar na dead on the spot an biktima.
Sa presente naiuli na sa harong kaini sa kataid na barangay an bangkay mantang dae pa makapanubod si Danilo sa biglaan na pagkagadan kan saiyang agom.
