LEGAZPI CITY—Arestado an sarong babae makalihis an ikinundusir na drug buy-bust operation kan mga otoridad sa Purok 2, Barangay Bagsa, Oas, Albay.
Segun ki Oas Municipal Police Station Chief of Police Police Major Nathaniel Jacob, sa intrevista kan Bombo Radyo Legazpi, binisto an suspek na si alyas “Jen”, 32-anyos, asin presenteng nakaistar sa Barangay Ponso, Polangui, Albay.
Naarestar ini sa aktong nagpapabakal nin ilegal na droga.
Nakumpiskar digdi an sarong pidaso nin medium size heat-sealed transparent plastic sachet na pigtutubudang shabu.
Afuera digdi, durante kan body search sa suspek, nakumpiskar pa an anom na pidaso nin small heat-sealed transparent plastic sachets na pigtutubudang shabu.
Nag-abot sa labi 5.1 gramos an gabat kan nakumpiskar na ilegal na droga asin may kantidad na pocomas o menos P10,000.
Nasa kustodiya na kan Oas MPS an suspek asin mahahampang sa kasong pagbalgar sa Republic Act 9165 o an Comprehensive Dangerous Drugs Act of 2002.
