LEGAZPI CITY- Naresibe na kan rehiyong Bicol an 100% na mga mga automated counting machines na gagamiton sa pirilian sa Mayo 12.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na naipaabot na sa lambang munisipyo an nasa 5,877 primary automated counting machines.
Napag-araman na nakahanda na man an mga contingency machines enkasong kaipuhanon ini.
Pinag-aantisiparan man sa aga an pag-abot kan mga balota para sa mga provincia kan Camarines Sur, Camarines Norte, Sorsogon asin Albay.
Dugang pa kan opisyal na mapuon na man sa Mayo 4 an pagdadara kan nasabing mga makina sa mga voting centers para sa final testing and sealing procedure na nakatalaan sa Mayo 5.
Katakod kaini, sinabi ni Valeza na imbitado man an gabos na mga partido asin kandidato na mahiling an proseso kan final testing and sealing ngani na masierto kan mga ini na malinig an dalagan kan preparasyon sa pirilian.
Nagpagirumdom sana an opisyal na magsunod an gabos sa mga polisiya na ipapaotob kan electoral boards.
