LEGAZPI CITY — Bako pa suboot klarado kun ano an magigin posisyon asin papel kan kontrobersyal na hepe kan Ozamis City na si Pol. C/Insp. Jovie Espinido sa assignment kaini sa island province kan Catanduanes.
Sa intrevista kan Bombo Radyo Legazpi ki Police Regional Office 5 (PRO5) spokesperson Pol. C/Insp. Maria Luisa Calubaquib, mismong ki PNP Chief D/Gen. Oscar Albayalde an kasuguan para ki Espinido kaya digdi man nakadepende an magiging direktiba sa hepe.
Sa ibong kaini, kaibanan sa mga pighihiling na posibleng magin assignment ni Espinido segun ki Calubaquib an pagiging hepe kan pulisya sa capital town na Virac o kaya an pagiging miembro kan Provincial Drug Enforcement Unit (PDEU).
Mientras tanto, makukumpirmar sana man ini en kasong mag-abot na hale sa abroad si Espinido alagad aminado an opisyal na excited nang makatrabaho an kontrobersyal na pulis.
Si Espenido an dating hepe kan Albuera, Leyte kan magadan sa laog kan Baybay City Provincial Jail an kaitong alkalde na si Mayor Rolando Espinosa taong 2016 mantang sa paglipat kaini sa ciudad kan Ozamiz kaitong 2017, nagadan man si Mayor Reynaldo “Aldong” Parojinog asin 14 na iba pa sa serye kan raids.
Dae man nadagos an nakatalaan kutang paglipat ni Espenido sa Iloilo City kun sain nagsisirbe si Mayor Jed Mabilog, saro pang opisyal na nasa listahan kan pigsasabing narco-politicians ni Presidente Rodrigo Duterte.
