LEGAZPI CITY- Pinaglalaoman na magigin dakulang tabang para sa mga lokal na paraoma asin parasisira an ayuda na ipinaabot ni Presidente Ferdinand Marcos Jr. asin iba pang mga ahensya de gobierno sa Bicol region.
Segun ki Department of Agriculture spokesperson Lovella Guarin sa intrevista kan Bombo Radyo Legazpi na dakol na mga Agrarian Reform Beneficiaries an nag-benepisyo sa programa.
Sa provincia kan Camarines Sur, napag-araman na nasa P471.8 million intervention support an naipanao kan office of the presidente asin mga partner agencies.
Kaibanan na sa nasabing kantidad an mga banhi na pananom asin mga fertilizers.
Paliwanag ni Guarin na kinakaipuhan na maitanom na ngunyan na Hunyo an nasabing mga banhi bilang paghahanda sa epekto kan La Niña sa rehiyon.
Napag-araman na nasa 8, 592 na bagong mga benepisyaryo man an natawan nin P5,000 cash assistance sa irarom kan Rice Farmers Financial Assistance sa nasabing provincia.
Afuera digdi, igwa man na mga makinarya na naipanao siring man an mga fingerlings nin bangus para sa mga parasisira na hali sa Bureau of Fisheries and Aquatic Resources.
Mientras tanto, sa pagbisita man kan presidente sa provincia kan Albay umaniabot sa labi sa P181 million an naibarewas na tabang para sa mga paraoma asin fisherfolks.
Afuera digdi, nasa 15, 288 hektarya nin tanuman man an sakop kan fertilizer dicount voucher sa 18 na mga lokal na gobierno sa Albay na magagamit para sa pagtatanom ngunyan na Hunyo.
Dugang pa ni Guarin na nasa P1.8 million man an itinagama para sa livestock asin poultry sa irarom kan Inspire project.
