LEGAZPI CITY- Klinaripikar ngonian kan Consultative Committee (ConCom) na bukas an siisay man urog na an government officials na magpahayag katakod sa ipigbubusol na pederalismo.
Katakod ini kan pigsasabing pagdesignar ki Presidential Communications Operations Office (PCOO) Asec. Mocha Uson bilang lecturer sa federalism.
Sa intrevista kan Bombo Radyo Legazpi ki ConCom member Atty. Susan Ubalde-Ordinario, pinahimutikan kaining nadiskutir sa ConCom en banc asin nadalaganan sana kan sarong informal discussion an nasabing orolay.
Ipigsuhestiyon sana kan Department of Interior and Local Government (DILG) an pag-imbita kan mga bistong personalidad sa “federalism rallies” tangarig na ma-engganyar an interes kan publiko asin nasambit sana an pangaran ninda Asec. Mocha siring man an aktor na si Robin Padilla.
Dugang pa ni Ordinario na magin si Presidential spokesman Secretary Harry Roque an nag-opresir man nin pagtatao nin timeslot sa government-run programs para digdi.
Mientras tanto, ipigduon man ni Atty. Ordinario na an 22-member ConCom pa man giraray an “best persons to talk to” sa ipigbubusol kan Duterte administration na federal system of government asin iba pang aspeto kan Konstitusyon.
