Kumpiyansa si Duterte Panagutin Network Convenor Jojo Lacanilao na dae magiging epektibo sa mga korte kan International Criminal Court (ICC) an mga argumento kan defense team ni dating Presidente Rodrigo Duterte.
Pighihingowa suboot kan defense panel na iladawan an dating presidente bilang inosente sa mga mass killings asin imbes an binasol an mga kritiko, media, asin mga non-government organizations (NGOs) na nagtuyaw sa saiyang drug war.
Pigpirit man suboot kan depensa na inosente an dating presidente asin an rinibong tawong nagadan sa irarom kan saiyang drug war puro ‘random’ o biglang pangyayari sana.
Segun ki Lacanilao, dae magigin epektibo an argumentong ini sa korte, urog nang napatunayan na kan prosecution na igwang mga mass killings na kaipuhan na imbestigaran sa international arena, huli ta dae man kalimitang naimbestigaran sa local setting.
Sinabi niya na an grupo kan depensa dai man nakasimbag sa nagkapira sa mga naenot na argumento kan prosekusyon, arog kan mga indibidwal na partikularmenteng ginadan sa kasagsagan kan drug war.
Segun pa sa beteranong abogado, an ipinapahiling kan prosekusyon iyo an tip of the iceberg pa sana, asin syertong magpepresentar nin mas dakol na ebidensya, kun ini makaabot sa sarong full trial.
Sa ibong kan pigkwestyon ni Kaufman an nagkapira sa mga naenot na ebidensyang iprinesentar kan prosecution, nagtutubod si Lacanilao na dae ini makakaapektar sa kun ano an na-establish kan piskalya na sunod-sunod na garadanan an nangyari asin igwang kill order gikan sa dating presidente na pig-implementar sa ground level.
.){kind=link}