LEGAZPI CITY- Pigduon kan sarong teachers group na warang pinagbago an ARAL law sa presenteng learning recovery kan education system sa nasyon.
Kun babalikan, naging ganap ng batas kasuudma an Academic Recovery and Accessible Learning (ARAL) Law makalihis na pirmahan ni Presidente Ferdinand Marcos Jr.
Segun kay Vlademir Quetua, an chairperson kan Alliance of Concerned Teachers sa intrevista kan Bombo Radyo Legazpi, na maski na igwang pinirmahan na batas an Presidente an wara man liwat ining pinagkaiba sa mga naenot na polisya kan gobyerno.
Kinakahadit kan nasabing opisyal na baad gibuhon sana an batas bilang panakip butas asin dakulang kahaputan man an pagkukuwaan nin pondo para sa mga materyales kan mga paratukdo asin bayad sa mga personahes.
Segun pa sa opisyal na magayon man an obheto na magdugang nin mga paratukdo alagad kahapotan man kaini kun pira sana man an pwedeng ihire na mga paratukdo kun saen 150,000 na mga paratukdo an kulang pa sa nasyon.
Sinabi man kaini na garing catch up man giraray an isasagibo kan ARAL law asin warang long term plan.
Suwestyon kaini sa gobyerno na magkaigwa na nguna nin konsultasyon sa mga paratukdo magin sa mga magurang kan estudyante, budgetan an mga education support personnel asin bawasan na nguna an ibang budget na dae man kaipuhan.
