LEGAZPI CITY- Dae pa nabibisto sa ngunyan an apat na nagadan sa 20 myembro kan New People’s Army na naka-engkwentro kan 2nd Infantry Batallion kan Philippine Army sa Brgy. Pangle Aroroy, Masbate.
Sa intribista ki Col. Fernando Trinidad, commanding officer kan 903rd IB Division, sinabi kaini na nag-ugat an nasambitan na bakbakan kan magkundusir nin combat operation an mga soldados sa pangengenotan ni Lt. April John Del Rosario makalihis na makaresibe nin sumbong sa mga residentes sa lugar dapit sa pangingikil kan rebeldeng grupo sa mga pobre.
Alas 6:20 nin aga nangyari an engkwentro sa pagultanan kan duwang lado na nagresulta sa pagkagadan kan apat na myembro kan NPA.
Sinabi man ni Trinidad na nakatalaan na darahon an bangkay kan mga ini sa banwaan kan Aroroy.
Narekober man sa pinangyarihan kan insidente an limang armas kan grupo na iyo an duwang M14, duwang M16 asin sarong grenade launcher.
Sa ngunyan, nagkukundusir nin pursuit operation an nasambitan na militar kontra sa NPA.
